專注力不足/過度活躍症 (ADHD)
🥳相信大家對大雄、胖虎並唔陌生🧐但又知唔知日本有學者用「大雄胖虎綜合症」嚟形容專注力不足/過度活躍症(AD/HD)？
👓大雄嘅專注力低、健忘、粗心大意，又經常半途而廢，代表咗「專注力不足型」嘅患者；
🫃🏻胖虎做事衝動、坐立不安、無時停無耐性，又中意打斷人講野，代表咗「過動為主型」嘅類型；
👼🏼而第三類就係混合型，即係有大雄嘅專注力不足，又有胖虎嘅過度活躍症狀。
AD/HD 成因
📥ADHD 嘅確切成因仲未明確，但研究指遺傳、懷孕時煙酒習慣、分娩時難產等嘅原因，都可能增加兒童患上 ADHD 嘅風險，因為呢啲風險會導致兒童腦額葉、小腦血流量少，並可能使多巴安、正腎上腺素失調。呢啲問題，正正會影響執行力同埋協調能力。
ADHD 的兩大問題
📚ADHD有兩大問題，分別係執行能力困難同動作表現困難。
🛠️執行能力困難有5項特徵：
1️⃣行為抑制能力不足
🔺抑制「有即時滿足」嘅行為反應：例如，做功課途中，要能夠抑制遊玩（可以有「即時滿足」嘅行為），先可以完成功課呢個 Task
🔺抑制「慣性行為」嘅能力：例如數學運算入面，由加數嘅慣性轉換做思考減數
🔺抑制「外來騷擾」嘅能力：例如喺思考過程中過濾外界騷擾
2️⃣時間管理能力弱
🔺未能有效估計 Task 進度所需時間，令 Task 未能於指定時間內完成、或草率完成，例如小息掛住玩冇留時間去廁所
3️⃣工作記憶弱
🔺未能於行動前，想清楚細節，或忘記其步驟
4️⃣重組能力弱
🔺未能存取舊經驗嘅記憶，按新環境需要，重新計劃
5️⃣情緒調適能力弱
🔺未能過濾情感，容易被人挑釁
⛹️動作表現困難有以下特徵：💔專注力不足型嘅肌肉力量、耐力、平衡力同協調能力都俾同齡兒童差，佢哋嘅本體感覺較弱，對動作力度同速度協調較差，最普遍就係球類活動表現麻麻
❤️🔥過度活躍型嘅體力十足，佢哋嘅體能表現大致同同齡兒童相約，但喺團隊同日常活動中，佢哋嘅動作計劃同組織能力遠較同齡兒童差，簡單講就係唔識 Planning。
動作表現困難改善方向
🐣ADHD 嘅小朋友大部份都有動作協調障礙，從而影響佢哋日常生活，包括運動、學習等等。
1️⃣透過調適覺醒狀態，令小朋友增加專注程度
2️⃣針對 ADHD 類型配合運動改善力量、協調同動作計劃
3️⃣根據小朋友喜好進行執行功能訓練
💡過度活躍型嘅小朋友需要專注喺動作協調同計劃訓練⛹🏻
💤專注力不足型嘅小朋友除咗動作協調同計劃訓練，亦要肌力強化同平衡訓練🏋🏻
覺醒狀態
🚥到底咩係覺醒狀態？覺醒狀態同學習表現息息相關!
🔵過低覺醒狀態代表人唔專注唔適合學習
🔴過高覺醒狀態代表人過度亢奮亦都唔適合學習
🟢適當覺醒狀態代表人唔受外界影響，最專注同適合學習
有咩方法可以調適覺醒狀態？
🤔訓練需要視乎小朋友年齡同理解能力，小學階段嘅小朋友可能要靠家長去分辨佢哋嘅覺醒狀態，大個少少嘅小朋友，就最好令佢哋學識自己察覺同調節自己嘅覺醒狀態!
⬇️我哋可以透過以下運動先調適我哋嘅覺醒狀態⬇️
🔻要調低覺醒狀態，可以做
1️⃣深呼吸
慢慢腹式呼吸2-3分鐘，雙手放胸口同腹部，感受腹部脹起
2️⃣嬰兒式
捲縮全身2分鐘，模仿喺子宮嘅環境
🚼以上動作能夠令肌肉漸進放鬆，繼而調節中樞神經嘅興奮程度，減少交感神經嘅刺激，令我哋可以由過高覺醒狀態降低至適當覺醒狀態。
🔺要調高覺醒狀態，可以做
1️⃣開合跳
跳動大概30秒，短時間內提高心率
2️⃣超人式
維持30秒至1分鐘，幫大肌肉進行熱身，促進血液循環
甚至可以做一啲進階動作例如左右手交替拍波⛹️!
✳️調適運動能夠提高心率，增加交感神經刺，同時兼顧身體左右兩側協調動作，促進腦部衍生神經傳導物（BDNF），改善神經元重塑。
♻️調整好覺醒狀態後，就要針對ADHD類型進行訓練!
〽️過度活躍嘅兒童肌力已經好好，反而需要消耗精力嘅活動，同時需要有力度控制、精細調整嘅元素
🧗🏻♀️例如類似繩網攀爬遊戲、🥄用匙羹運乒乓波遊戲等，呢類遊戲需要佢哋放電，同時能夠令佢哋學識點樣控制力度同肢體動作，避免過分衝動，以致「輸咗遊戲」。
專注力不足型-運動例子
💢專注力不足嘅兒童動作協調同計劃表現較弱，所以要額外加強肌力同平衡力
🦀例如可以玩吓Animal walk，同小朋友進行模仿動物行走嘅遊戲，可以提升肌肉力量同耐力，改善體力差嘅問題
🪿另外平時亦可以進行單腳平衡遊戲，例如喺屋企可以踩咕𠱸，喺公園可以踩下石壆當行平衡木
💪改善好肌力同平衡先可以幫專注力不足嘅小朋友改善動作協調。
執行能力訓練
🙈ADHD嘅小朋友有執行能力問題，尤其係行為抑制能力上有所不足。要進行執行能力訓練，可以試下以下遊戲
1️⃣UNO
UNO形式千變萬化，有唔同顏色同數字，家長可以透過制定規則，例如指定顏色或者指定數字嘅冚棉胎，甚至係簡單地玩UNO，都係訓練小朋友抑制慣性行為嘅好遊戲!
2️⃣想動態啲可以係一啲運球遊戲，家長可以設計一條障礙物路線，要小朋友起唔掂障礙物嘅情況下將球體由A點運到B點，而唔係淨係靠快或靠大力就可以做到。呢類遊戲可以幫助小朋友訓練動作計劃能力，同時改善抑制能力。
設計遊戲比ADHD小朋友要記住的三大原則！
1️⃣合理難度：太難嘅遊戲會令小朋友節節挫敗而感到氣餒，最後發脾氣
2️⃣規則簡潔：ADHD 嘅小朋友未必可以咁快理解到抽象規矩，所以要盡量簡化遊戲，令佢哋容易跟從
3️⃣善用獎勵：當小朋友做得好嘅時候，要給予適當獎勵，以培養適當嘅行為，咁樣小朋友先會學識遵守規矩、服從指令同減少對抗性行為！
🏃🏼♂️至於ADHD大人嘅運動改善原則都係一樣!先調適覺醒狀態，再針對ADHD類型做翻相應運動訓練，最後可以配合遊戲，例如Board Games/Ball Game訓練執行功能!
😊希望幫到大家!👍
References:
Martella, D., Aldunate, N., Fuentes, L. J., & Sánchez-Pérez, N. (2020). Arousal and Executive Alterations in Attention Deficit Hyperactivity Disorder (ADHD). Frontiers in psychology, 11, 1991.
Mulraney, M., Arrondo, G., Musullulu, H., Iturmendi-Sabater, I., Cortese, S., Westwood, S. J., Donno, F., Banaschewski, T., Simonoff, E., Zuddas, A., Döpfner, M., Hinshaw, S. P., & Coghill, D. (2022). Systematic Review and Meta-analysis: Screening Tools for Attention-Deficit/Hyperactivity Disorder in Children and Adolescents. Journal of the American Academy of Child and Adolescent Psychiatry, 61(8), 982–996.
Piek, J. P., Dyck, M. J., Nieman, A., Anderson, M., Hay, D., Smith, L. M., McCoy, M., & Hallmayer, J. (2004). The relationship between motor coordination, executive functioning and attention in school aged children. Archives of clinical neuropsychology : the official journal of the National Academy of Neuropsychologists, 19(8), 1063–1076.
Shuai, L., Daley, D., Wang, Y. F., Zhang, J. S., Kong, Y. T., Tan, X., & Ji, N. (2017). Executive Function Training for Children with Attention Deficit Hyperactivity Disorder. Chinese medical journal, 130(5), 549–558.