早產嬰兒
👶🏻由小到大成日聽人講七星仔，即懷孕期滿七個月(28周)分娩嘅早產嬰兒，老一輩仲話七星仔聰明啲。
🙂傻啦，醫學角度上，早產嬰兒係先天不足，器官未完全發展好就被迫離開母體！所以對比足月嬰兒，早產嬰兒更需要特殊嘅護理保健！
🤱🏻早產，係指嬰兒喺懷孕未滿37周時出生，具體可分為三類：
🔹極早早產（小於28周）
🔹早期早產（28至32周）
🔹中期至晚期早產（32至37周）
📊現時全球早產嘅普遍率係5至18%，而本港，近年早產嘅普遍率維持於6.5-7%。早產嬰兒因為器官嘅發育尚未成熟，好容易會出現健康問題，所以往往都要喺醫院逗留一段長時間，當早產嬰兒可以自主呼吸、可以通過奶瓶吃奶、體重穩定增長，就可以接返屋企喇。
🧠由於嬰兒住院期間較長，加上早產令腦部發展唔成熟，嬰兒對於感官統合會有難度，一般會對外界刺激較為過敏，所以家長要學習同早產嬰兒溝通嘅方法。咁點先為至合適嘅刺激？我地可以透過統合發展模式 (The Synactive Theory of Development) 去理解早產嬰兒嘅行為。
統合發展模式指出，如果刺激嘅時間唔恰當或者複雜性同強度唔適當，嬰兒會保護自己免受刺激， 如果唔適當嘅刺激持續存在，嬰兒將無法再維持子系統(Subsystem)嘅穩定平衡；如果時機正確並且複雜性同強度適當，嬰兒會嘗試尋找刺激來源並作出正面反應，同時保持子系統(Subsystem)處於穩定。
統合發展模式包括5個子系統(Subsystem)，分別係：
🫀自主神經調節——指生命徵象，如膚色、顫抖/驚嚇、心率同呼吸頻率
👋🏽動作——觀察嬰兒嘅肌肉張力、動作、活動同姿勢
👀清醒狀態——代表中樞神經系統喚醒水平，如困倦/昏昏欲睡、清醒/警覺、煩躁/哭泣
👁️專注——代表嬰兒對刺激作出嘅專注反應
👶🏻自我調節——代表嬰兒維持以上四個子系統平衡嘅努力
嬰兒反應例子
👅簡單嚟講，當刺激適當時，嬰兒會想吸引你注意，佢會張開眼睛，靜靜望住你，再望別處，又會望望你，佢會放鬆呼吸，鬆弛地微微曲起手臂同腳瓜，有時緊握雙手，或者將手仔放到嘴到。
🫤當刺激唔恰當時，嬰兒會表現煩躁同哭泣，呼吸急促，肌肉將力提高，伸直手臂同腳瓜，拱起背部，緊閉雙眼，唔望向你，或者擰轉臉。
嬰兒緊張不安時應付方法
😬早產嬰兒早期時未有足夠精力應付大量感官刺激，只可以同一時間做一件事，如果嬰兒緊張不安，可以盡量幫助佢放鬆，例如用毛巾捲幫助嬰兒保持舒適嘅彎曲位置、握著嬰兒嘅手、或著畀佢地吸吮物件等等。
咁你可能會問，早產嬰兒咁敏感，可以點樣增加他們對外界嘅適應？
嬰兒感官刺激建議
😌我地可以有系統地逐步提供聽覺、觸覺、視覺同前庭刺激。例如：
先提供聽覺，由用溫柔、愉快嘅聲調同嬰兒傾計；
一段時間後，慢慢加入觸覺，輕撫、按摩嬰兒；
當嬰兒張開雙眼後，嘗試拱埋同嬰兒進行眼神交流；
一段時間後，暫緩觸覺刺激，保持聽覺同視覺，加入前庭刺激，輕晃嬰兒；
咁就可以提高嬰兒嘅專注力，以進行其他活動玩樂。
🧐注意嘅係，當嬰兒嘅專注力減弱，代表已經疲倦，咁就要暫停活動同休息㗎喇！希望以上資訊可以幫到早產嬰兒嘅新手父母啦！早產嬰兒比足月嬰兒更容易有發展遲緩，出院時記得向兒科醫生查詢，轉介物理治療師作定期嘅評估吖！
References:
Als H. (1982) “Towards a synactive theory of development: promise for the assessment of infant individuality” Infant Mental Health Journal, 1982;3(4): 229-43.
White-Traut, R. C., Rankin, K. M., Yoder, J. C., Liu, L., Vasa, R., Geraldo, V., & Norr, K. F. (2015). Influence of H-HOPE intervention for premature infants on growth, feeding progression and length of stay during initial hospitalization. Journal of perinatology : official journal of the California Perinatal Association, 35(8), 636–641.