紓緩治療
物理治療都有善終服務?
今個post會講一個比較嚴肅沉重嘅話題 — 紓緩治療。唔知大家又有冇聽過紓緩治療呢個概念呢？當提及紓緩治療，唔少人都會諗到末期癌症，但其實晚期病亦包括末期腎衰竭、心臟衰竭、慢阻肺病、運動神經元病等疾病。唔少末期病人和家屬喺生活上都有唔少嘅困難，而紓緩治療旨在為佢哋提供全人治療，從多方面改善生活素質，以協助患者走完人生最後嘅里程碑。
根據世衞嘅定義，紓緩治療是為照顧患有危疾重病嘅病人和家人嘅方法，以改善其生活質素。透過及早識別、評估及處理痛楚和其他身體上、心理社交上或靈性上嘅問題，以預防和減輕病人的痛苦。
末期病人和家屬常見嘅問題
根據 “Total Pain Concept”，晚期病人遇到嘅問題可以分為幾個方面。喺生理(Physical)方面，病人會有唔同程度嘅徵狀，如疼痛、疲倦、氣促等，而因為身體機能下降，佢哋嘅活動能力亦可能受限，以至行動不便、無法自理等…… 喺心理社交(Psychosocial)方面，患者可能感到抑鬱焦慮、充斥著對死亡嘅恐懼、覺得自己為家人帶來重擔…… 喺靈性(Spiritual)方面，患者覺得失去憧憬或希望、失去生存嘅意義…… 而家屬喺照顧上亦充滿壓力，感到緊張及焦慮。
👨⚕️紓緩治療嘅跨專業團隊👨⚕️
當中團隊包括醫生、護士、醫務社工、臨床心理學家、物理治療師、職業治療師等，為病者和家屬提供紓緩治療服務。
物理治療提供的紓緩治療
1️⃣疼痛(pain)
經皮神經電刺激 (TENS)：能短暫舒緩疼痛。
按摩：可短暫舒緩疼痛、改善心情或情緒。
2️⃣疲倦(fatigue)
適量嘅帶氧運動或肌力訓練：可以改善身體疲倦嘅情況，亦能改善耐力、活動能力(如步行)及睡眠。
3️⃣水腫(oedema)
按摩(manual lymphatic drainage)：可以促進淋巴循環。
壓力治療(pressure therapy)如壓力襪，或儀器如lymphopress：能減少淋巴回流及積聚。
適量嘅運動：可增加muscle pump，促進血液和淋巴循環。
4️⃣氣促(dyspnea)
適量嘅肌力訓練、步行、樓梯訓練，使用適定嘅助行器。
靜態呼吸運動(mindful breathing)、Fan therapy。
針灸。
5️⃣塞痰(sputum retention)
體位轉移(positioning)。
顫動排痰(Vibration)。
6️⃣照顧者壓力(carer stress)
物理治療師提供照顧者訓練，令家人學識如果為患者做轉移(transfer)和扶行(assisted walking)。
教家人協助患者做適當嘅運動、協助排痰嘅技巧。
✅物理治療師喺紓緩治療上擔當著一定嘅角色，當然以上嘅治療都只係專業技術，最重要係治療師喺患者身邊陪伴、聆聽患者嘅心聲、解答患者嘅疑難，為病人和家屬喺心理社交上提供支援，好讓患者走完最後一程。
References:
Emanuel, L. L., & Librach, S. L. (2011). Palliative care e-book: Core skills and clinical competencies. Elsevier Health Sciences.
World Health Organization. (2013). WHO Definition of Palliative Care