馬尾症候群 (Cauda Equina Syndrome)
馬尾症候群(Cauda Equina Syndrome)
個個都話有腰痛腳痺🚶🏻♂️, 但有種腰痛唔及早發現可能會癱👨🏼🦽!? 坊間成日話d有腰痛又腳痺嘅人有坐骨神經痛，已經夠慘但係有無諗過有d仲危險？今日想同大家講下馬尾症候群(Cauda Equina Syndrome)，如果唔及早發現，嚴重嘅話甚至有機會癱。
呢一款咁危險嘅腰痛腳痺係馬尾症候群 (Cauda Equina Syndrome，CES)，係指腰椎中嘅馬尾 (Cauda equina) 俾腰椎嘅病變所壓住而影響到骨盤/下肢機能，腸道同膀胱系統功能。而平時成日講嘅坐骨神經痛 (Sciatica)，係指由脊髓延伸嘅脊神經 (Spinal nerve root) 被壓住而影響周邊神經系統功能 (Peripheral Nervous System)，例如其中一邊下肢麻痺無力。而壓住神經嘅結構其實有好多，例如後縱韌帶鈣化 (Posterior Longitudinal Ligament ossification)、腰椎小關節肥厚 (Facet joint hypertrophy) 等等，並唔係個個都係椎間盤突出，骨刺…
🔅主觀徵狀🔅
由於絕大多數嘅馬尾症候群係由腰椎嘅病變引起，所以患者大多都會有腰痛，但都市人十個有六個都有腰痛，如果有埋以下嘅主觀徵狀(Subjective Examination)，就要作詳細嘅臨床客觀檢查:
1️⃣麻目位置：
-大髀內側或跨下間失去發麻/感覺
-腰背或臀部周圍麻木
2️⃣排泄系統：
-排尿時有「滴滴仔」情況
-控制尿流難度增加
-大小二便失去急意
-大小二便慘漏或失禁
3️⃣性功能系統
-性能力出現障礙 （陽萎等等）
-性交過程生殖器失去感覺
🔅馬尾症候群客觀檢查🔅
有以上嘅組合徵狀，就要進行客觀檢查 (Objective Examination）, 包括：
1️⃣神經學檢查
感覺: 跨下或雙腿麻目
肌力: 下肢肌力下降（特別係小腿肌肉Calves）
深部肌腱反射: 特別係踝部反射下降
步態評估：步履不穩
2️⃣膀胱及肛門檢查（通常由醫生或護士進行）
肛門指診：肛門張力/收縮下降
膀胱超聲波檢查：餘尿量: >500mL
3️⃣性功能反射（通常由醫生或護士進行）
球莖海綿體反射失調：
刺激男性龜頭或女性陰蒂，肛門收縮現象會消失，而呢個檢查準確度，敏感性(Sensitivity)同特異性(Specificity)係接近100%。
如何評估 CES 期數？
🤷🏿♂️咩係「紅旗」同「白旗」？
有專家再將CES嘅症狀細分做紅旗 (Red flags) 同白旗 (White flags)，能有助及早發現 CES，選擇合適嘅治療方法，及預測之後嘅治療效果 (Prognosis)。
🚩「紅旗」嘅預後及處理：
紅旗嘅症狀包括雙腳神經根病變 (radiculopathy)，以及雙腳神經功能缺損愈嚟愈差 (progressive neurological deficits of legs)，簡單啲講即係雙腳冇力、麻痺、反射減弱等⋯⋯而紅旗嘅病人預後良好，如果盡早接受治療，85%嘅人可以免受神經痛嘅影響，大部分病人能夠回復正常大小便功能及性功能。
👉專家建議呢類病人最好盡早照磁力共振 (MRI)，如果發現神經受壓能夠盡早做手術，如減壓術 (decompressive surgery)。如果係椎間盤突出引起嘅 CES，物理治療師能透過合適嘅運動、手法治療、電療紓緩症狀。
🏳「白旗」嘅預後及處理：
白旗嘅症狀包括會陰部失去感覺、大便失禁、及尿失禁/滯留。呢類嘅病人預後較差，神經功能缺損難以逆轉，即使盡早處理都只係得48-93%機會轉好 (並非完全康復)，長遠嚟講大機會會大小便失禁以及失去性功能。
👉專家建議呢類病人要即刻照MRI，48 小時內要做緊急手術。基本上物理治療喺白旗方面無法提供治療，但物理治療師有責任盡早發現任何「紅旗」和「白旗」，提醒病人至急診室應診，以免病人延誤治療。
👍希望呢個post可以幫大家認識到某啲腰痛徵狀其實係危險訊號，及早發現能夠避免延誤治療。其實腰痛有好多原因嘅，並唔係個個都坐骨神經痛。而坐骨神經痛亦係因為唔同嘅原因導致，並唔係個個都椎間盤突出，骨刺等。之後會再有post同大家講下腰痛嘅迷思，幫大家了解下自己條腰，希望大家都分清楚，腰背痛，不只限於坐骨神經痛!