Cardiac Rehabilitation
背景
心臟病係香港第三位頭號殺手，而冠心病則佔咗心臟病死亡嘅58.8%。
冠心病係指供血比心臟肌肉嘅冠狀動脈受心血管斑塊及血栓阻礙而收窄，以致心肌嘅血量減少，導致活動時出現心絞痛。
心臟病亦包括心肌梗塞、心律不整、缺血性/瓣膜性心臟病、心肌病變、心包膜炎/心肌炎/心內膜炎、甚至一啲先天性心臟病。
心臟病常見徵狀有心絞痛(常見於牙鉸、左邊心口、上背、左邊肩頸)、心悸、氣喘、疲累、昏厥、多汗、腳踭水腫、發紺等…
心肌梗塞的手術治療
我屬唔屬於高危人士 ? 可唔可以做運動 ?
心血管疾病有以下嘅風險因素，例如缺乏運動習慣(Physical inactivity)、年齡(男≥45歲；女≥55歲)、家族史有心肌梗塞(Past Medical History)、吸煙、肥胖(BMI≥30)、高血壓、血脂異常、糖尿病等。而透過運動可有效控制部分風險因素!
風險分層(Risk stratification)
🧑🏻⚕️運動前可以根據以上風險因素分為三個風險分層，再根據不同分層進行運動耐力測試，確保運動強度適合，安全進行運動。
⬇️「低風險」:有一個或以下嘅心血管疾病風險因素，以及冇心臟病徵狀。進行最大強度運動測試(Maximal Exercise Test)和次最大強度運動測試(Submaximal Exercise Test)未必需要醫生在場，可由物理治療師進行，而且運動前未必一定需要做體檢。😊
➡️「中風險」:有兩個或以上嘅心血管疾病風險因素，但並冇心臟病嘅徵狀。次最大強度運動測試可由物理治療師進行，但進行最大強度運動測試就一定要有醫生在場！而且建議做高強度運動前最好要做體檢!🏥
⬆️「高風險」:本身有心血管疾病，而且有心臟病嘅徵狀。進行任何運動測試都建議必須有醫生在場!而且進行任何強度嘅運動前建議必須要做體檢!👩🏻⚕️
運動前檢查
運動前可以做咩檢查？
📄大家運動前或計劃增加運動強度前，可以自行完成「體能活動適應能力問卷(PAR-Q)」，了解有冇潛在心血管問題。🕵🏽♂️問卷適合15-69歲人士，如果係年齡範圍外而又冇做開運動，建議直接諮詢醫生。如果問卷題目有一項或以上係答「是」，建議諮詢醫生。如果全部都係答「否」，就可以諮詢物理治療師或自行逐漸增加運動強度，自我監察有冇不適情況。🏃
🏃♂️最大強度運動測試/次最大強度運動測試
🏃♀️大家可以進行「最大強度運動測試」，例如跑步機測試(Bruce Protocol)或單車測試(Ramp Protocol)，測試者以All Out形式進行測試。💨透過監察心跳、心電圖、血壓、呼吸氣體分析、心臟病徵狀，以計算出最大攝氧量(VO2 max)，亦即係最高可承受嘅運動強度，從而決定一個合適同安全嘅運動強度。🥰
🚴♂️而「次最大強度運動測試」同以上相似，亦包含跑步機測試、單車測試、踏台階測試，測試者無需All Out，以稍低於最大負荷的強度進行測試，透過監察所提及指標估算出最大攝氧量。此測試通常較為安全，但可能需要做多過一次測試先可以令估算更準確。😍
心臟復康運動指引
⚠️ 運動注意事項：
1. 飯後一小時內、環境太熱/凍、精神或心情欠佳(如憤怒)，應避免進行運動。
2. 帶定脷底丸(TNG)旁身，心口痛時可以放在舌頭下。
3. 穿著舒適嘅運動鞋同衫褲。
4. 配戴智能手錶自我監察心跳、血氧、ECG等。
5. 運動時保持正常呼吸，切勿閉氣。
6. 運動時注意心臟病發徵狀，如有任何徵狀，應立即停止運動。如果徵狀於停止運動後仍然持續甚至加劇，就要立即求醫啦!
心臟復康第一階段(住院期間)
👨🏻⚕️ 接受手術後大概1星期，病人會喺嚴密心臟監測下進行運動，防止體能狀況下降，促進病人儘快出院回家。復康運動會根據”7 steps”，由最初床上/床邊進行簡單手腳關節活動，慢慢增加運動強度，到後期踏步、行路甚至行樓梯。
🏃 心臟復康第二階段(門診復康)
🏠 病人出院後需進行維持約6-8個星期的門診復康，病人仍需喺嚴密心臟監測下進行運動，以訓練返心肺功能，防止心臟病復發。
每一節運動應包含熱身運動及緩和運動，中間配合帶氧運動或強化運動。
🏃♂️帶氧運動：例如快步行、踩單車、手單車、划船機等，每星期做3-5日，每日20-60分鐘，物理治療師會先計好安全合適的運動強度。
🏋🏼♂️強化運動：需要心肌梗塞或心臟手術後最少5個星期後先可以開始。可以進行啞鈴、橡筋帶、器械訓練，以訓肌肉，每星期做2-3日，每日約20分鐘，物理治療師會先計好安全合適的運動強度。
🏡 心臟復康第三階段(社區復康)
🏃🏼♂️ 病人雖然唔再需要嚴密心臟監測，但需要長遠維持健康運動習慣，每個星期至少2-3日運動(正如Phase 2)。保持良好生活習慣，例如定時服藥、健康飲食、戒煙戒酒等，亦要保持心理社交上健康。
以上係心臟復康嘅例子，如果有心臟病但又想做運動，要先諮詢醫生或物理治療師! 如有任何疑問，歡迎查詢!
References:
American College of Sports Medicine. (2013). ACSM’s guidelines for exercise testing and prescription. Lippincott williams & wilkins.
AACVPR. (2013). Guidelines for cardiac rehabilitation and secondary prevention programs. Human Kinetics.